Arbeidskraftundersøkinga

Data frå Arbeidskraftundersøkinga (AKU) er innsamla og tilrettelagd av Statistisk sentralbyrå (SSB).

Arbeidskraftundersøkinga er ei representativ nasjonal undersøking som Statistisk sentralbyrå gjennomfører årleg og kvartalsvis. AKU starta i 1972 og gir informasjon om blant anna kor mange som er sysselsette, arbeidsledige eller utanfor arbeidsstyrken, arbeidstid og arbeidstidsordningar for dei som er sysselsette, og ulike tema som handlar om sysselsetting, arbeidsforhold og arbeidsmiljø. AKU er ei av få undersøkingar med svarplikt. Dette gjer at undersøkinga har høg oppslutning. Svarprosenten har variert noko over tid, men har stort sett lege på over 80 prosent. AKU er utstyrt med ulike populasjonsvekter, som bidrar til å sikre representativitet og gjer det mogleg å berekne populasjonstal.

Sidan oppstarten i 1972 har det vore fleire tidsseriebrot i AKU, og årsakene til desse har blant anna vore overgang frå papirskjema til elektronisk skjema, overgang frå datainnsamling éin gong i månaden til kvar veke, auka bruk av registerdata som erstatning for spørsmål, endringar i rekkjefølga på spørsmåla i spørjeskjemaet, og innføring av nye variablar. I tillegg har det vore fleire oppdateringar av statistiske standardar, til dømes endring av standard for næringsgruppering frå SN2002 til SN2007. Dei mest sentrale variablane har likevel vore med sidan oppstarten i 1972, og AKU kan difor gi tidsseriedata for sysselsette, arbeidsledige og personar utanfor arbeidsstyrken for heile perioden. Frå januar 2021 er det nytta eit nytt skjema for AKU. I tillegg er blant anna utvalsplan, målpopulasjon og estimeringsmetode endra. Sjå artikkelen Ny AKU gir brot i tidsseriane (ssb.no).

Ei meir omfattande beskriving av AKU finn du her: Dokumentasjon av Arbeidskraftundersøkinga (ssb.no).